مسمح  يومك يابنغازي

(1)

مسمح يومك يا بنغازي// فوق أترابك، مات الغازي

الله وأكبر// الله واكبر

 إف عدلك ياربي متوازي

***

رفرف طيرك // عاد الوكره

ويغرد فوق الأغصان

زهرك زهر // فاح أبعطره

ويعود ربيعك ويبان

فرحة عمت // تصبح ذكري

سبحان الخالق سبحان

عيشي ايامك بكرة وبكرة

محمية بفضل  الرحمن

يمهل مايهمل ظلامك

ايحاسب في أدم و ايجازي

مسمح يومك يا بنغازي// فوق أترابك، مات الغازي

الله وأكبر// الله واكبر

 إف عدلك ياربي متوازي

**********

 (2)

مسمح يومك يا بنغازي// فوق أترابك، مات الغازي

فرحة طفلك// بين اقرأنه

ويغنى بأجمل الالحان

عاد لبيته // ولــ جدرانه

والعابه وأيام زمان

يجري غادي// يقفز هانا

يحكي ف إخباره وإشجان

يخبر إن العيلة رجعت

يحكى زعلان وفرحان

قاللهم اسرتنا عادت

رجعولى ناسي واعزازي

مسمح يومك يا بنغازي// فوق أترابك، مات الغازي

الله وأكبر// الله واكبر

إف عدلك ياربي متوازي

*********

(3)

مسمح  يومك يا بنغازي// فوق أترابك، مات الغازي

عادت ناسك // بطيب انفاسك

كانوا كلتهم غياب

عاد أمانك // واطمئنانك

والنخوة بين الشباب

عاد هواك // وسمح أجوائك

والعشرة  بين الشياب

كانت عين // وكان مصابك

وكانت حرب وكان إرهاب

وكان رجالك // في ميدانك

وكان الخالق فيك ايوازي

مسمح يومك يا بنغازي// راح بسوه ، مات الغازي

الله وأكبر// الله واكبر

إف عدلك ياربي متوازي

ما هو تقييمك لهذه المشاركة؟

عن حسن أبوقباعة

حسن ابوقباعة المجبرى،مواليد :1970 ،بكالوريوس علوم 1993 ،حائز على الترتيب الثالث بمسابقة الابداع الشبابى على مستوى ليبيا 2010 ، له رواية صادرة عام 2005 هى رواية (غياهب الحى المقابل ) ، يكتب في صحف ورقية عدة اهمها ( أحبار بنغازى / وأخبار طرابلس ) اسس صحيفة الأيام وترأس تحريرها حتى 20 يناير 2013، عضو اللجنة التحكيمية في المسابقة اليومية لقصة الومضة .

اضف رد

لن يتم نشر البريد الإلكتروني . الحقول المطلوبة مشار لها بـ *

*

إلى الأعلى