إلى ليبيا التي نحب… مازال بدري ع الرحيل

من أعمال التشكيلية مريم هنيدي
من أعمال التشكيلية مريم هنيدي

مازال بدري ع الرحيل
ياشايلة شنطة الشوق ف يدك
وقاصدة شط الغريب .. متاهة
هاوينا تحت الشمس قاعد مكانك فاضي
ومرسوم ظلك ع الورق 
ويندهلك نهار بخير .. لا غاب من هو يسمعه 
ولا غيبوا النداهة ..
مكسورة بمعاني خيبتك
وغياب حرف الجر 
من اسمك المكتوب 
ف عيون عشاقك .. دمع وصلاة
بلا معجزة في ايديك 
لا الرمل راسملك علي 
صفحة التيه .. درب ونجاة
ولا مركبك لبست اطواق نجاها ..
مازال في عيونك حنين 
ترد الحمامة لعشها 
وتلمس جناح الورد 
وتذوبي كما قطرة شهد
في ريق العطش والجوع ..
ماتغيري الموضوع ..!!
بلا حضن عاشق..
يعصرك كيف العنب 
تذبل احلامك ع الشفق
وتموت فيك البذرة 
في غياب من يرعاها ..
مازال في صدرك مطر 
يهطل علي صبرك ربيع وثلج
يبرد على قلبك لهيب غيابك
ماتسكريش كتابك ..
عندي كلام ناسيه في عيوني 
بندير منه خيط
ونربطه في خصلات شعرك ذكرى … 
تفكرك باحبابك 
وبنقولك قبل ماتعطينا بقفاك وتغربي
(صيوره يطيح اطياح .. سعد اليأس مو ديمة قوي)
_________________
القاهرة
1/8/2014

عن سالم العالم

الاسم: سالم مصطفى حسين العالم تاريخ الميلاد: 28/11/1968 مكان الميلاد: روما/إيطاليا المؤهلات العلمية: بكالوريوس علوم سياسية-جامعة قاريونس 91 مجالات الكتابة: الشعر الشعبي واللهجة المحكية/ الأغنية تعريف قصير: عاش بمدينة بنغازي وتلقى بها تعليمه الأول، حتى الجامعي ليتخرج أولاً على دفعته في العام 1991 من جامعة قاريونس-علوم سياسية.. في 1987 بدأ بكتابة الشعر والأغنية.. إصدارات: انا والليل خوت (شعر محكي). خريف الريح (شعر محكي). محكيات (شعر محكي). ابتسمي (شعر غنائي). على جوك (شعر محكي).

التعليقات مغلقة

إلى الأعلى