أسـوار الوطـن

جمال الدلة/فلسطين

سيجنا أسوار الوطن بالصبر والصبـار

واللوز غير موسمو واستعصت الأمطـار

والشمس إنكسفت خجل واستسلم الإعصار

وصارت سفينتنا حجر وتبخرو الآبـار

وما عاد يطلع بالشبك غير شجب واستنكار

طفرة تحول أذهلت كل عبقري وجبـار

وحار المجرب والذكي من كثرة الأعـذار

وبالبوصلة زل القدم وتذبذب السونـار

ولمع البرق وذاب الثلج وتقطعو الأوتـار

وصاح الحجر ليش التخاذل عن سبق إصرار

الذل مش طبع الأبي ولا شيمة الأحـرار

شمتـو بالصمت العدا وتمردو الأشـرار

وهجم الجراد وأقحلت واسودت الأخبـار

بفخر بمهنة والدي .. شو بشتغل ؟؟ حجـار

وبعطي شحف لأخوتي وبيرجمو الغـدار

والطفل بحكي للحجر محظوظ بالأنصـار

صارلك صور وتصورت للشاشة والثـوار

تنهد حجرنا وجاوبو لولا أشبال صـغار

بعمر الورد لستوطنو وقلعو جـذور الـدار

إنت وأنا كباش الفدا وما بنقبلش بالـعار

وعين الجبان والنذل نامت عن أخذ الثـار

أربعين ألف تقيدو في معتقل أنصـار

رهن التعسف والقهر والذل والإفقـار

وفي قدهم جرحى .. عجب .. ما وصلتك أسرار

وألوف شباب إستشهدو مع حمزة والطيـار

بس الحقيقة واضحة والمثل نطق وقـال

الي الدهور بتفسدو ما يصلحو العطـار