|
قـبل يومـين
جمال الدله / فلسطين
أبوي أجا قبل يومـين من فلسطين لو تـدرا
بقلو يابا كيف حالك إتشردق وغص بالعـبرة
قلي يا إبني أظن إنو معك من حالنا فكـرة
لكني لقيت العكس وعذرت إمك على الحـسرة
يا ريت إني ما خلفتك ولكن شاءت القـدرة
بديت أندم لأني إرضيت اطاوعكم بهالـسفرة
وبدأ يروي وكأنو بلال بتعذب تحت صـخرة
حالي كيف يا ولدي مثل فارس بلا مهـرة
هيرتزل جاب دباباته وهدمت دارنا الذكـرى
وبحقدو خلع اّلزيتون ما خلاّ ولا شجـرة
وتركت أختك مع الجرحى وإبن عمك مع الأسرى
وإمك زغردت لأخوك وللشهداء والثـورة
وأخوك إستشهد ووصى وداعتك أختك الصـغرى
لا تنسى تجيبلها مريول تروح المدرسة تـقرا
حالي كيف ياولدي مثل فارس بلا مـهرة
عساك بتذكر التينات واللوزات والصـبرة
وعساك بتذكر الخروب وزيتوناتـنا الخضـرا
مسح دمعات عن خدو إعتدل وتوسد بنـهرة
قلي ياإبن إفدي المسجد الأقصى وافدي قبة الصخرة
والقيامة حطها بعينيك وافدي المهد والـعذرا
ما بتسمع كسر العظام بعزف ع الوتر جـفرا
وانتوا بترقصوا ع الجرح ما فيش إحساس بالمرة؟
ما بدنا قروشكو خبوها للسهرات والشـعرة
وليلى بتسكب الكاسات وقيس بيحتسي الخـمرة
إنحسبتوا أسيادنا وصرنا بنحرث أرضكم سخرة
إن شئتوا بتبعثوا قرشين باقي فضلة السـفرة
وبعض قروشكم وصلت لشيخ الحي والحـضرة
تفاجأنا بظرف يومين صارت خُشتو عمـرة
وخلع ثوب الورع واصبح مثل فرعون بالكشرة
ووزع جزء ع أزلاموا وقال إتجاوزوا الفـقرا
وبالصدفه دري موسى بعد ما خفت الغبـرا
وصاح الناس يا موسى إنقذنا جوعنا إستشرى
ولع غيظهم لما دري موسى ودعوا السـحرة
وصاروا يساوموا موسى على التمرات والجمرة
بسيطة إحنا تعودنا وأخذنا بالـ فقر دورة
لكن .....
موسى جاي يافرعون مايخلي بلحيتك شعرة
حالي كيف يا ولدي مثل فارس بلا مـهرة
صاروا بيدفنونا أحياء قبل نموت بالحـفرة
وإنت جايي تعشمنا بدولة تعين السـفرا
بكفي نوم يا عربان شدوا خيلكوا الضـمرة
وصيحوا بهيبة الفرسان واحكوا الحق... لو مـرة
قبل هاليوم هاجرنا ونزحنا مرة اخـرى
ومتأكد إذا ما صحيتوا والله فيها من الوطن هجـرة
وساعتها إن لفينا هون
أكلنا لحومكم خـضراء
بتقلي ليش ياولدي علينا تشد د النـبرة
لأنو الشجرة المابتثمر وخشبها مسوس وناخر
بنقطعها وبنحرقها ووراها مية ألـف عثـرة
الجنة ما بنقبلـها إذا فيـها هوان وذل
ودار العز نسكنها لوإنها جهنم الحـمرة |
