يــا صـاحبي

يا صاحبي نا كبدتي مليوعه

العينات سلوى وقامته مردوعه

قامته طوالي

ما نشهره وما نقول غير غزالي

من يومن عشقته ما عجبني والي

الناس كلها في حافره مجموعه

الناس كلها في صيبه

وهوْ رجح بالكل فاز نصيبه

اللي حجره عني عطيه مصيبه

تخليه يشحت كبدته مليوعه

غـزال الريــم

غزال الريلي كنّه مواطي عينه

وقارن حجاجه ما يبهْت فينا

مواطي راسه

خايف من نّقار والبصاصه

اللي حجّره مولاي عطيه رصاصه

تجيه ماكنه بالقيس فوق جبينه

كنّك نافر

انت مسلم وعندك دين ولا كافر

نا ياغزال الريم بكره مسافر*

نخليك لنَّــقار بينك بينه

* نظمها "رفيق" قبيل سفره إلى تركيا، في هجرته الثانية سنة 1936.

خـذوا العـقـل

خذوا العقل خلّوني ندوح وراهم

اعزاز ما نطيق نعيش بلاهم

نارهو ولاَّعه

اعزاز ما نطيق نغيب عنهم ساعه

خذوا العقل خلّوا خاطري باوجاعه

يخمم على مقعد جديد معاهم

نارهم كوّايه

وين ما نروق تشيط فوق معايا

نجي مستفيث نريدهم طفـّايه

يزيدوا حطب ع النار من يالاهم